Home / Lajme / Maqedoni / Ahmeti – Panariti:Forcimi i imazhit të faktorit shqiptar në rajon si faktor i rëndësishëm

Ahmeti – Panariti:Forcimi i imazhit të faktorit shqiptar në rajon si faktor i rëndësishëm

22 shtator-Të dy bashkëbiseduesit, duke u ndalur në marrëdhëniet dypalëshe theksuan nevojën e realizimit të një bashkëpunimi më të ngushtë ekonomik, që do të siguronte edhe një lidhje më të mirë të biznesit shqiptar me biznesin e shqiptarëve në Maqedoni.

Kryetari i Bashkimi Demokratik për Integrim, Ali Ahmeti, mbrëmë në Pogradec të Shqipërisë, takoi Ministrin e Punëve të Jashtme të Republikës së Shqipërisë, Edmond Panariti.

Siç thuhet në kumtesën e kabinetit të tij çështjet e diskutuara në takim kishin të bënin me marrëdhëniet dypalëshe Shqipëri-Maqedoni, rolin e faktorit politik shqiptar në Maqedoni, ecurinë e zbatimit të Marrëveshjes së Ohrit dhe me zhvillimet e tjera në të dy vendet dhe në rajon.

Ahmeti, nga ana e tij, bëri një pasqyrë të aktivitetit dhe gjendjes së BDI-së, e cila po përpiqet të japë kontributin e vet konstruktiv për të gjitha zhvillimet në vend. Ai theksoi se në drejtim të zbatimit të Marrëveshjes së Ohrit, ka pasur progres lidhur me përmirësimin e përfaqësimit të shqiptarëve në administratën publike, veçanërisht në organet e mbrojtjes, duke theksuar se atje ku ka vullnet, proceset përparojnë. Gjithashtu, ai nënvizoi nevojën për përshpejtimin e zbatimit në praktikë te detyrimeve që rrjedhin prej saj.

Ministri Panariti vlerësoi pozitivisht ecurinë e zhvillimit të marrëdhënieve ndërmjet dy vendeve. Ai theksoi domosdoshmërinë që niveli aktual politiko-diplomatik i marrëdhënieve mes të dy vendeve të pasohet edhe nga një bashkëpunim më intensiv dhe më produktiv në të gjitha fushat e tjera me interes të ndërsjellë, por edhe në intensifikimin e bashkëpunimit rajonal dhe realizimin e aspiratave të përbashkëta të dy vendeve për integrim në strukturat euroatlantike.

Të dy bashkëbiseduesit, duke u ndalur në marrëdhëniet dypalëshe theksuan nevojën e realizimit të një bashkëpunimi më të ngushtë ekonomik, që do të siguronte edhe një lidhje më të mirë të biznesit shqiptar me biznesin e shqiptarëve në Maqedoni.

Gjithashtu ata përshëndetën përmbylljen e pavarësisë së mbikëqyrur të Kosovës, si një arritje të madhe historike jo vetëm për Republikën e Kosovës, por për të gjithë kombin shqiptar dhe popujt e tjerë të Ballkanit. Vlerësuan progresin e Kosovës në raportet e saj me BE-në, marrjen e udhëzuesit për liberalizimin e vizave dhe fillimin e studimit të fizibilitetit për MSA-në. Theksuan nevojën e zbatimit të marrëveshjeve të arritura në dialogun teknik Kosovë-Serbi, me lehtësimin e BE-së.

Në kuadër të 100 vjetorit të Pavarësisë u diskutua mbi punën që po
bëhet, kalendarin e aktiviteteve dhe koordinimin e hallkave përgjegjëse në të dy vendet tona, si dhe u shpreh domosdoshmëria e realizimit të një bashkëpunimi të ngushtë institucional ndërmjet subjekteve politike shqiptare në Maqedoni edhe me synim forcimin e imazhit të faktorit shqiptar në rajon si faktor i rëndësishëm, konstruktiv për paqe, stabilitet dhe bashkëpunim.

Në takim u shpreh gatishmëria për ruajtjen e kontakteve dhe bashkëpunimit në të ardhmen. Tv KOHA

Gjithashtu lexo

Kujt i pengon xhamia në Kodrën e Diellit dorëzohet padi penale ndaj ndërtuesit të xhamisë

Pronarët e vilave në Kodrën e Diellit deri në Prokurorinë Themelore Publike në Tetovë, kanë …

Leave a Reply

Your email address will not be published. Required fields are marked *