Home / Lajme / Maqedoni / Babai i Komandat Malishevës: Ju tregoj kush ishin shqiptarët që tradhtuan Grupin e Kumanovës

Babai i Komandat Malishevës: Ju tregoj kush ishin shqiptarët që tradhtuan Grupin e Kumanovës

Një vit pas rastit të Kumanovës, ku 10 kosovarë u vranë dhe 19 të tjerë u burgosën në Maqedoni, pas një aksioni të armatosur, ende nuk është bërë shumë e qartë se çfarë realisht ndodhi.

Në Ora e Fundit në Klan Kosova, Skënder Krasniqi, babi i Muhamet Krasniqit i njohur si Komandant Malisheva dhe i burgosur në Maqedoni, ka thënë se kosovarët shkuan në Maqedoni për të çliruar shqiptarët, porse u tradhtuan më pas.

Ai thotë edhe se e di kush e tradhtoi Grupin e Kumanovës.

“Ata kanë shkuar për çështjen shqiptare, për t’i çliruar gjithë shqiptarët që janë në Maqedoni dhe kanë shkuar me ftesë të disa shqipfolësve të cilët u ngritën kurth dhe i tradhtuan. Unë i di emrat, por unë do t’i them ata emra. Por, ata janë shqiptarë të Maqedonisë në bashkëpunim me strukturat maqedonase. Ata janë të shitur për të ruajtur pozitat e veta në qeveri dhe bashkëqeverisjen”, ka thënë Krasniqi në Ora e Fundit.

“Është një faktor i fuqishëm politik që i ka ftuar këta në Maqedoni”, ka shtuar Krasniqi, i cili vitin e kaluar pat përmendur BDI-në dhe kryetarin e saj, si tradhtarë të Grupit të Kumanovës.

Skënder Krasniqi ka treguar edhe për keqtrajtimet që u bëjnë policia maqedonase kur shkojnë për të vizituar djemtë e tyre në burgjet e Maqedonisë.

“Ne familjaret që shkojmë për t’i vizituar djemtë tanë në burg, njësia speciale maqedonase na kontrollon lakuriq, dhe na i kontrollojnë edhe veturat në detaje, kurse ata që janë të burgosur kanë keqtrajtime psikike dhe jetojnë në kushte të mjerueshme”.

Krasniqi, duke përcjellur bisedat që i zhvillon me djalin e tij kur e takon, tregon se asnjë nga të burgosurit nuk ndjehet fajtor për atë çfarë kanë bërë, por është një ndjenjë tjetër që i mundon ata.

“Ndjehen të tradhtuar. Por asnjëherë nuk janë penduar se shkuan në Kumanovë, sepse qëllimi ishte madhor, por ranë në tradhti dhe s’kishin çfarë të bënin”.

Babai i Komandat Malishevës ka pohuar se nuk ka besim fare në drejtësinë e Maqedonisë dhe se qeveritë e Kosovës e Shqipërisë nuk kanë bërë asgjë për të ndihmuar shtetasit e vet.

“Unë nuk besoj në drejtësinë në Maqedoni, por shpresoj se do të intervenojë faktori ndërkombëtar. Ndërsa faktori shqiptar, as në Kosovës e as në Shqipëri, nuk ka bërë asgjë për ata të burgosur”.

Krasniqi ka mohuar edhe njëherë se i ashtuquajturi Grupi i Kumanovës ishte paguar për të shkuar në Maqedoni.

“Nuk shkuan për para, askush nuk vdes as për miliarda euro, ata shkuan për ideal, sepse për ideal jepet edhe jeta”, ka thënë Krasniqi në Ora e Fundit në Klan Kosova.

Gjithashtu lexo

Shkarkohet Zvërlevski, me 64 vota për dhe asnjë kundër

Kuvendi i Maqedonisë, pas debateve disajavëshe maratonike të deputetëve VMRO-DPMNE-së, e shkarkoi kryeprokurorin publik Marko …

Leave a Reply

Your email address will not be published. Required fields are marked *