Vala e personave të cilët po kërkojnë azil në Belgjikë është shkaktuar për shkak të menaxhimit të keq me fondet evropiane dhe margjinalizimin e rajoneve, në të cilat shumicë janë shqiptarë, e jo për informimin e keq të qytetarëve, akuzoi PPD në konferencën e sotme për shtyp.
Sekretari i përgjithshëm i partisë Ilir Luma, theksoi se Qeveria me paratë evropiane i zhvilloi vetëm ato pjesë ku shumicë janë maqedonasit.
"Si pasojë e politikës së tillë gjatë këtyre ditëve po ballafaqohemi me valën e azilantëve shqiptarë. Pikërisht për këtë zotëri Iv Leterm, nëse keni mundësi ta shqyrtoni gjendjen në rajonin e Likovës të Kumanovës dhe nëse keni informacione precize nga nikoqiri juaj, ku dhe si janë shpenzuar një pjesë e IPA fondeve, atëherë do të bindeni se shkaku për numrin e rritur të kërkuesve të azilit ekonomik nuk është mosinformimi i qytetarëve, por informacionet jopërkatëse të cilat janë dërguar në Bruksel nga ana e Ervan Fueres për mënyrën e shpenzimit të këtyre parave", tha Luma.
Prandaj PPD kërkoi që një komision i veçantë evropian të kryejë kontroll dhe revizion që të përcaktojë se si janë shpenzuar të gjitha fondet nga viti 2007 dhe të bëhet riorganizim i personelit në Sektorin për koordinim me ndihma të huaja në kuadër të Sekretariatit për çështje evropiane.