Arrestohet Radovan Karaxhiç

22 korrik - Një nga personat më të kërkuar në botë, ish- udhëheqësi serb i Bosnjes Radovan Karaxhiq, është arrestuar pas gati 13 vitesh në arrati. Arrestimi i tij u konfirmua nga presidenti serb Boris Tadiq, i cili tha se zoti Karaxhiq u arrestua nga forcat serbe të sigurisë. Gjykata Ndërkombëtare për Krimet në ish-Jugosllavi ka kërkuar arrestimin e tij që në vitin 1995 së bashku me ish-komandantin e tij ushtarak Ratko Mladiq, i cili është ende në arrati. Në njoftim nga kabineti i presidentit të Serbisë thuhet se pas arrestimit zoti Karaxhiq është nxjerrë përpara gjyqëtarit hetues për krime të luftës në Gjykatën e Qarkut në Beograd në harmoni me ligjin mbi bashkëpunimin me gjykatën e Hagës. Nuk jepen hollësi se ku është arrestuar Karaxhiq dhe a ka bërë rezistencë gjatë arrestimit. Kryeprokurori i gjykatës së Hagës Serge Brammertz e mirëpriti arrrestimin dhe tha se zoti Karaxhiq do të transferohej në Hagë në kohën e duhur. Një javë më parë paqeruajtësit e Bashkimit Evropian bastisën shtëpinë e gruas së zotit Karaxhiq në Bosnje. Atëhere, ata thanë se operacioni ishte bërë për të parë se çfarë lidhjesh kishte familja me të. Karaxhiq akuzohet nga Gjykata e Hagës me 15 raste gjenocidi, krime lufte e krime kundër njerëzimit, si dhe krime të tjera të kryera në vitet 1992-96. Kundër tij u ngrit akt-padi për herë të parë në vitin 1995 së bashku me komandantin e tij Mladiq për vrasjen e civilëve gjatë rrethimit të Sarajevës. Katër muaj më vonë kundër tij u ngrit akt-padi për gjenocid për organizimin e vrasjeve të rreth tetë mijë burrave dhe të rinjve myslimanë në Srebrenicë. Akt-padia thotë se Karaxhiq planifikoi sulme ndaj civilëve, arrestimin e grave, fëmijëve e pleqve për shkak të identitetit të tyre kombëtar e fetar, dhe shkatërrimin e vendeve të shenjta në Bosnje.

Sondazh

Për moment nuk kemi asnjë sondazh