Pas 6 vjet e 15 ditë vuajtje dënimi, sot burgun e Idrizovës e lëshoi Agim Behluli nga Kumanova i cili ishte dënuar me 7 vjet burg për vepra penale, terrorizëm, që lidheshin me dy shpërthime në Kumanovë, dhe një në hekurudhën ndërkombëtare Shkup-Beograd që kalonte afër fshatit Vaksincë gjatë vitit 2003 . Me kërkesë të bashkëshortes dhe fëmijëve të tij Gjykata Supreme solli vendim për zbutjen e dënimit. Me këtë vendim Gjykata i uli Behlulit dënimin për 9 muaj, ndërsa për sjellje të mirë, edhe burgu i Idrizovës i ka falur 2 muaj e gjysëm.

“Ja këto çaste e lash prapa shpine burgun e Idrizovës dhe muret e larta. E lash terrin e zi dhe pres që prej sot të më zbardh drita. Me gëzim dhe dëshirë do ti nisem rrugës së shtëpisë, me padurim pres ti takoj fëmijët e mi, bashkëshorten time, familjen time, farefisin tim, por më e keqja është se nuk do ti takoj prindërit e mi të cilët vdiqën” tha Agim Behluli, ish i burgosur.

Familjarët dhe vet Agim Behluli gjatë tërë kohës procesin e tij e kishin vlerësuar si të montuar politik, sikurse rasti i Sopotit. Agim Behluli ishte arsimtar, gazetar dhe aktivist i njohur i sektorit joqeveritar në vend, i cili vazhdimisht ka tërhequr vërejtjen për procesin e montuar ndaj tij, por gjithnjë kishte hasur në veshët e shurdhër të institucioneve kompetente.Alsat-m