Kryeministri Sali Berisha i është bashkuar sot dhimbjes së familjarëve të viktimave që 3 vjet më parë humbën jetën në tragjedinë e Gërdecit.

Përmes një mesazhi të veçantë në këtë ditë, kryeministri u bën thirrje institucioneve të drejtësisë të mos vonohen në ndëshkimin e përgjegjësve të kësaj tragjedie.

“Nga ana tjetër, kryeministri përshëndet aktin dinjitoz të banorëve të Gërdecit, distancimin e tyre nga loja makabre që po vazhdon të luajë Partia Socialiste dhe kryetari saj Edi Rama me dhimbjen e të afërmve për jetët e të humburve të 15 marsit sa herë afrojnë fushatat elektorale”, thuhet në njoftimin e publikuar në faqen zyrtare të Këshillit të Ministrave, lidhur me këtë fakt.

“Kujtojmë se në 2 vjetorin e kësaj tragjedie Edi Rama nuk u kujtua fare për viktimat pasi nuk ishte vit elektoral. Qeveria garanton banoret e kësaj zone se do të angazhoje të gjitha mundësitë e saj për të ndihmuar e lehtësuar jetën e tyre”, shtohet në njoftimin përkatës.