Nga data 12 deri më 18 prill në vend janë raportuar 46 raste të reja me kollën e keqe, me rritje prej 4,5 për qind krahasuar me javën e kaluar, njoftoi pasditen e sotme Instituti i Shëndetit Publik (ISHP).

Shumica e rasteve janë raportuar si pjesë e epidemisë në Shkup – 37, ndërsa raste janë raportuar edhe në Manastir – tre, Kumanovë – dy dhe nga një në Tetovë, Kriva Pallankë, Prilep dhe Strumicë.

Mosha e pacientëve varion nga një muaj deri në 73 vjeç, ndërsa numri më i madh i rasteve janë nga grupmosha 10 deri në 14 vjeç. Sa i përket statusit të vaksinimit të të sëmurëve, 31 persona janë të pa vaksinuar, të pavaksinuar ose me status të panjohur vaksinimi, 13 janë të vaksinuar plotësisht dhe dy janë të vaksinuar sipas moshës.

Nga 46 rastet e reja, nëntë raste janë shtruar në spital.

Deri më 18 prill, në vend janë regjistruar gjithsej 489 raste me kolln e keqe, me një incidencë prej 26.6/100 mijë banorë.

Kjo paraqet një rritje të disafishtë të numrit të të sëmurëve krahasuar me pesëvjeçarin e kaluar 2019-2023, kur janë regjistruar gjithsej 10 raste.

Edhe po zhvillohen dy fushata parazgjedhore paralelisht, programet e kandidatëve për president dhe të partive politike nuk kanë arritur tek banorët e një pjesë të fshatrave malorë. Banorët e fshatit Tanushë thonë se as nuk e dinë se çfarë oferta kanë dhe as kush është kandidat për t’i përfaqësuar ata në Kuvend. Ata ankohen se me problemet e njëjta ballafaqohen me dekada, por askush nuk interesohet për hallet e tyre.

“Ka filluar tashmë fushata, asnjë parti as askush nuk ka ardhur me na pa ne se si jetojmë, të na premtojmë diçka, të na tregojë se unë do të jem përfaqësuesi juaj, ne nuk e dimë kush është përfaqësuesi ynë, si fshatar…Sipas informatave të mia, mbi 1000 banorë janë me vendbanim në Tanushë, ata janë të shpërndarë, por kanë adresat e Tanushës… ditën e zgjedhjeve vijnë votojnë këtu…Mirëpo gjithmonë kanë votuar bosh, e kemi dhënë vetëm votën dhe kurrë më zërin nuk ja kemi dëgjuar asnjë politikani”, tha Xhemail Jakupi, Përfaqësues i fshatit Tanushë.

“Askush s’ka ardhur këtu të na e qajë dertin, në mes të Shkupit atje ku mbajnë partitë mbledhje atje ka, po nuk më intereson se kush e bën, por në fshat askush nuk ka ardhur, as që është interesuar dikush me ardh me pa çfarë halli kemi…As që jam i varur prej asnjë politike, prej asnjë partie as që varem”, u shpreh Emërlla Veli, banor i fshatit Tanushë.

“Pa rrymë, shtyllat të gjitha janë thyer askush nuk interesohet, telat shihe si kanë rënë në tokë, një ditë mund të na djegin, s’vjen askush. Kur vjen puna te votat të gjithë vrapojnë, hajde me votu, si të votojmë, si të ua japim kur ne nuk kemi aspak kushte këtu.. Vetëm zgjedhjet kur të afrohen, atë asfalt që e kanë shtruar, copa-copa, kur ka ardh koha e zgjedhjeve, kanë ardh e kanë bërë sa për sy e faqe…Sot nuk vjen kërkush me na i mbajt dertet e hallet”, tha Sefer Xhaferi, banorë i fshatit Tanushë.

Për shkak të kushteve të vështira dhe lokacionit në të cilin ndodhet, Tanusha pothuajse është boshatisur nga njerëzit. Sipas informacioneve të banorëve, vetëm rreth 5 shtëpi janë të banueshme gjatë gjithë vitit, të tjerët shkojnë në Tanushë vetëm gjatë stinës së verës. /Alsat.mk

Kreu i Lëvizjes BESA Bilall Kasami sonte në tubimin e VLEN në Strugë ka ironizuar me seancën e improvizuar të Frontit Europian, ku Ali Ahmeti është zgjedhur kryeministër, Ziadin Sela kryeparlamentar, Bujar Osmani president.

Kasami ka deklaruar se duhet të lutemi edhe për kundërshtarët, duke shtuar që Zoti tua ruajë mendjen, sepse pushteti vjen e shkon, ndërsa mendja është gjë e shtrenjtë.

“Po shoh aq fytyra të vendosura mes jush që janë të gatshëm që të hapin një kapitull të ri të historisë së lavdishme të popullit tonë dhe popujve në vendi tonë të përbashkët”. Kështu e ka nisur fjalimin e tij sonte para kumanovarëve kandidati për President nga Fronti Europian Bujar Osmani.

“Për disa ditë ju do të vendosni a jemi për integrim, a jemi për izolim. Ky është vendimi që ju me dorën tuaj duhet ta merrni. Por, vota e juaj nuk është vetëm zgjedhje e njëhershme. Është një investim për të ardhmen. Është një investim që do të ndërton një mur karshi këtij nacionalizmi hakmarrës, që për disa ditë mund të instalohet në vendin tonë”, tha Osmani.

Osmani u zotua se do të përkushtohet për të ndërtuar një shtet ku secili fëmijë mund të ëndërron pa kufij.

Kandidati për president nga radhët e VLEN, Arben Taravari, ka shprehur zotimin për të luftuar emigrimin duke rritur pagën minimale në vendin tonë. Në kuadër të qeverisjes së ardhshme, planifikohet që pagat të rriten deri në 800 euro, duke krijuar mundësi të reja për të rinj e të reja që të qëndrojnë dhe të kontribuojnë në zhvillimin e vendit.

Përmes granteve për teknologji e inovacion, Taravari tha se qeveria synon të mbështesë idetë e tyre kreative, duke u fokusuar në zhvillimin e vendit si një alternativë atraktive për të rinjtë.

“Emigrimi në vendin tonë është mbi çdo normë, shifrat janë alarmuese. Ne nuk mund të qendrojmë indiferent krahas kësaj situate. Kështu që, si qeverisje e ardhshme e VLEN, ne do të marrim vendim për rritjen e pagës. Do të angazhohemi parreshtur që paga minimale deri në fundin e mandatit tonë të parë qeverisës të jetë 800 euro. Përmes granteve për teknologji e inovacion, do të mbështesim të rinj e të reja, me idetë e tyre kreative, të cilat në radhë të parë i shërbejnë zhvillimit tonë si shtet. Kjo do të jetë edhe një arsye shtesë për ta që të shohin të ardhmen këtu tek ne, jo larg shtëpive të tyre, jo larg vendlindjes së tyre.” – marrë nga fjalimi i Arben Taravarit në tubimin qendror në Strugë.

Fronti Evropian thotë se VMRO po bën union me parti proruse dhe antishqiptare.

“VMRO dhe Mickoski edhe zyrtarisht po proklamon koalicionin me Levicën e Apasievit dhe partinë ZNAM të Dimitrievskit, dy parti këto të lidhura ngushtë me Moskën dhe qarqe të ndryshme pro ruse, si dhe të njohura për qëndrimet antishqiptare.

Në tubimin e Ohrit, Mickoski kërkoi unitet kombëtar maqedonas, pa etnitë tjera në vend, me qëllim që, siç tha, shteti të hiqet nga duart e shqiptarëve.

Fronti Europian i përkujton Mickoskit se Maqedonia e Veriut me kohë e ka trasuar rrugën e barazisë, demokracisë dhe të anëtarësimit në familjen e madhe Europiane.

BDI dhe Fronti Europian, si front multietnik në Maqedoninë e Veriut, nuk do të lejojë që vendi të kthehet mbrapsht drejt izolimit ndërkombëtarë, ndërsa kjo do të vuloset më 24 prill dhe më 8 maj, kur dr. Bujar Osmani do të zgjedhet President shteti, ndërsa Fronti Europian do të jetë çelësi për formimin e Qeverisë së ardhshme.

Njëkohësisht, i bëjmë thirrje opozitës shqiptare të vetëdijesohen dhe të rreshtohen me pro-europianët dhe të mos bëhen vegël e qarqeve ruse në vend.”, thuhet në reagim. (INA)

Qendra për Kërkime Politike dhe Komunikim – CRPC  në bashkëpunim me Shoqatën për gazetari, informim, komunikim dhe shërbime të marketingut “Глас на вистината” realizoj anketën e dytë në prag të zgjedhjeve Presidenciale 2024, përcjell Kanal5.

Të pyetur: Për cilin kandidat do të votojnë në zgjedhjet presidenciale, qytetarët janë përgjigjur me sa vijon:

Për kandidaten e VMRO DPMNE Gordana Siljanovska Davkova do të votonin 20,4% e të anketuarve, ndërsa për konkurrentin e saj kryesor, presidentin aktual Stevo Pendarovski nga LSDM-ja, 16,8% e të anketuarve do të jepnin votën e tyre.

Në bllokun politik shqiptar, Arben Taravari nga koalicioni “VLEN”, sipas sondazhit është para Bujar Osmanit nga Fronti Evropian i udhëhequr nga BDI.

Kështu që, për Taravarin do të votonin 7.9% e qytetarëve të anketuar, ndërsa për Osmanin 6.9% e të anketuarve.

Për Maksim Dimitrievskin nga ZNAM do të votonin 2,7% e të anketuarve, ndërsa për Biljana Vankovskën nga Levica 2,6% . Për kandidatin Stevço Jakimovski nga GROM do të votonin 1,2% e të anketuarve.

Poashtu, 18.2% e qytetarëve nuk mbështesin asnjërin prej kandidatëve , ndërsa 23.2% nuk kanë dhënë asnjë përgjigje.

Anketa është realizuar përmes telefonit në periudhën prej 8 deri më 13 prill të këtij viti me 1210 të anketuar, të përzgjedhur sipas një metode të rastësishme.
Hulumtimi është realizuar në nivel të gjithë territorit të Republikës së Maqedonisë së Veriut , duke u kujdesur për kriteret si: përbërja etnike, numri i votuesve, dhe shpërndarja gjeografike. Margjina e gabimit +/- 3,0%. Rezultatet e anketës së realizuar, së bashkë me analizën e të dhënave e gjeni në grafikën e mëposhtme dhe e njëjta është e disponueshme në platformën online të Qendrës për Kërkime Politike dhe Komunikim. Anketat e CPRC u morën për bazë edhe nga agjencia e njohur evropiane e sondazheve Europe Elect.  (INA)

Ministria e Arsimit dhe Shkencës njofton se mësimi në vitin shkollor 2023/2024 do të realizohet plotësisht siç parashihet me planet për organizimin e punës në shkollat ​​fillore dhe të mesme. Edhe pse votimi në kuadër të rrethit të parë dhe të dytë zgjedhor është caktuar në ditë pune, nxënësit nuk do të humbasin mësimet dhe nuk do të kalojnë pjesë të materialit mësimor.

“23 prilli dhe 7 maji, gjegjësisht ditët para votimit, do të jenë ditë pune për të gjitha shkollat. Gjegjësisht në shkollat në të cilat do të zhvillohet procesi zgjedhor, mësimi do të mbahet nga ora 07:00 deri në orën 11:00, me orë të shkurtuara mësimore për të gjitha paralelet gjegjësisht klasat. Në shkollat e tjera, në të cilat nuk do të votohet, mësimi zhvillohet si zakonisht dhe sipas orarit të caktuar ditor”, thuhet në kumtesën e Ministrisë së Arsimit dhe Shkencës.

MASH më tej rikujton se viti mësimor për nxënësit e shkollave të mesme zgjat deri më 10 qershor, ndërsa për nxënësit e shkollave fillore deri më 17 qershor.

“Edhe pse votimi në kuadër të rrethit të parë dhe të dytë zgjedhor është caktuar në ditë pune, nxënësit nuk do të humbasin mësimet dhe nuk do të kalojnë pjesë të materialit mësimor”, thekson MASH-i.

Njoftimi i dërguar deri te shkollat e ka publikuar edhe Sindikata e pavarur për arsim, shkencë dhe kulturë (SASHK) në faqen e tyre në FB, me pyetjen: “Nga kur ditët jopune brenda natës bëhen ditë pune?”

“Ministri i Arsimit duhet të tërheqë menjëherë Njoftimin për shkollat, me të cilin detyrohen të punojnë ditët “jo pune”, të shpallura nga Qeveria, për shka të mbajtjes së zgjedhjeve të ardhshme. Në të vërtetë edhe edhe vitet e tjera shkollore kanë përfunduar dhe janë verifikuar nga ministri me më pak se 180 ditë pune, siç është viti shkollor 2021/22”, theksohet në reagimin e SASHK-ut.

Ndryshe, këtë vit nxënësit për herë të parë do të kenë pushim pranveror, i cili do të fillojë më 29 prill dhe do të zgjasë deri më 6 maj.