Kandidati për president nga radhët e VLEN, Arben Taravari menjëherë pas tubimit në sheshin “Skëdërbeu”, në TV21 tha se me një fjalë do ta definonte tubimin me fjalën “shpresë”.

“Një pamje impozante, frymë e jashtëzakonshme, energji pozitive që nuk mund të përshkruhet me fjalë, me një fjalë në qoftë se komplet doni ta definoj tubimin e sotëm, do të kisha thënë, shpresë…shpresë për ndryshim”, tha Taravari.

Kandidati për president nga radhët e Frontit Europian, Bujar Osmani u zotua që siç tha, nëse fiton koncepti i integrimit karshi izolimit, Maqedonia do të bëhet anëtarë e Bashkimit Europian deri në vitin 2030.

“Unë besoj fuqishëm në ofertën të cilën e kam dhënë, besoj fuqishëm në përvojën që e kam krijuar, në sinqeritetin dhe përkushtimin që kam për të realizuar ëndrrën më të madhe të njerëzve për anëtarësim në familjen europiane dhe të gjithë energjinë time, gjithë këtë përkushtim e përvojë do i investojë për një të ardhme më të mirë. Unë zotohem para tyre që nëse fiton koncepti i integrimit karshi izolimit, ne do të bëhemi anëtarë në Bashkimin Europian deri në vitin 2030”, tha Osmani.

Kryetari i Lëvizjes BESA, Bilall Kasami, në tubimin qëndror të VLEN, në sheshin e Shkupit i ka dërguar një sërë pyetjesh kryetarit të BDI-së, Ali Ahmeti.

“Ali, kur dëshiron të shitesh patriot po të pyes hapur: Përse nuk e kërcënove shefin tënd, Nikolla Gruevskin kur u vra komandanti i UÇK-së Harun Aliu?

Ali Soravia, përse nuk e kërcënove shefin tënd Nikolla Gruevskin kur u montua rasti Monstra?

Ali Kazinoja, përse nuk e kërcënove shefin tënd Nikolla Gruevskin kur ndodhi rasti i Kumanovës?

Ali tradhtia, përse nuk e kërcënove shefin tënd Nikolla Gruevskin kur shqiptarët rriheshin çdo ditë nëpër Shkup?

Ku ishe fshehur atëherë Ali tenderi, dhe pse shfaqesh tani kur të rrezikohet Sovaria, Eurovia dhe Llotarija.

Kam edhe një pyetje që e parashotrojnë gjithë shqiptarët për dy dekada: Ali ku ishe kur u vra komandant Teli dhe ju bë atentati komandant Hoxhës?

Bëhu burr, e dil përgjigju o Ali Ahmeti!” ka deklaruar Kasami.

Kandidati i VLEN-it për president, Arben Taravari sot bashkë me liderët e koalicionit VLEN, mbajti tubimin e fundit në Shkup në sheshin “Skënderbeu”.

Në fjalimin e tij, kandidati i VLEN-it për president, Arben Taravari theksoi se në tubimin e fundit në Shkup, vjen pas shumë takimeve dhe tubimeve anembanë vendit duke përfshirë edhe diasporën dhe se kanë dëgjuar nga afër problemet e qytetarëve me të cilat ballafaqohen tash e 22 vite.

“Po vijmë këtu pas shumë tubimeve dhe takimeve anembanë qyteteve dhe fshatrave të tjera të vendit, ku kemi parë dhe kemi prekur problemet e përditshme të njerëzve tanë. Varfëria dhe mungesa e punës, problemet në klinikat dhe spitalet, mungesa e investimeve dhe subvencioneve, këto janë fatkeqësisht realiteti i popullit tonë pas 22 viteve me qeveri të papërgjegjshme dhe të korruptuar. Po vijmë këtu, edhe pas tubimeve masive në diasporë, ku morëm mbështetje nga ata që ndihmojnë çdo ndryshim pozitiv, nga vëllezërit dhe motrat tona në mërgatë. Po vijmë këtu pas takimeve me Albin Kurtin dhe me shumë miq e vëllezër nga Kosova, të cilët maksimalisht po e përkrahin fitoren tonë. Shumë e madhe është nevoja për ndryshim. Jemi të vetëdijshëm se çfarë detyre na pret. Detyrë sa e rëndë aq edhe fisnike, prandaj dhe u bëmë bashkë që të gjithë si një ALEANCË, me një LËVIZJE të përbashkët, ta japim BESËN, e nën numrin 6 të ofrojmë një ALTERNATIVË që VLEN”, u shpreh Taravari.

Taravari u shpreh se është për një Maqedoni të Veriut e anëtarësuar në Bashkimin Evropian, me miqësi të përhershme me SHBA-të dhe se të veprimet e koalicionit VLEN do të jenë në përputhje të plotë me interesin strategjik të SHBA-ve.

“Si President i Republikës, zotohem se politika ime e jashtme do të jetë e bazuar në vlerat evropiane dhe properëndimore, me synim për anëtarësimin e vendit në Bashkimin Evropian. Këtë do ta arrijmë edhe me përkrahjen e aleatit tonë të përhershëm, pa ndihmën e të cilit nuk do të ishim këtu ku jemi sot – Shtetet e Bashkuara të Amerikës. Për ne miqësia me Amerikën është e shenjtë dhe Koalicioni VLEN është zotuar se çdo hap i yni në vijim, do të jetë në përputhje të plotë me interesin strategjik të SHBA-ve, pra një Maqedoni e Veriut e integruar në BE dhe larg ndikimeve ruse, një Maqedoni e Veriut e shëruar nga epidemia e korrupsionit si parakusht për zhvillim shoqëror dhe ekonomik. Si President i Republikës, zotohem se do të punoj me zell që Maqedonia e Veriut të jetë një shtet i sigurt dhe ta promovojë sigurinë dhe paqen rajonale. Do të kujdesem që të kemi aftësi kredibile mbrojtëse, si pjesë e obligimeve tona në NATO dhe BE”, u shpreh Taravari duke shtuar se do të luftojë ta kthejë besimin te sistemit i drejtësisë duke luftuar korrupsionin dhe do të mbrojë me gjithë qenien e tij demokracinë konsensuale, lirinë e shprehjes dhe sistemin e drejtësisë.

DPHM informoi se nesër, nën ndikimin e një valë të lagësht, do të jetë me vranësira me reshje të shiut., të cilat sidomos në pjesët perëndimore dhe jugore të vendit do të jenë më të mëdha, vende-vende mbi 20 litra në metër katror, të rrëmbyeshme dhe të përcjella me bubullima dhe erë të fuqishme dhe mbi 60 kilometra në orë. Era përgjatë Vardarit do të përforcohet edhe të mërkurën

Të mërkurën dhe të enjten do të ketë paraqitje lokale të reshjeve dhe bubullimave, ndërsa pastaj vijon një periudhë e motit stabil dhe gradualisht ngrohje e motit.

Kryetari i LSDM-së, Dimitar Kovaçeski gjatë mitingut në Tetovë tha se të gjithë partitë politike në zonën gjashtë kanë propozuar kandidat për deputetë nga e kaluara, ndërsa vetëm LSDM ka kandidat për të ardhmen.

“I shikoj listat e deputetëve nga Njësia zgjedhore numër gjashtë dhe i shikova të gjithë kandidatët. Ju keni shtatë lista, kur të shikoni të gjithë kandidatët e këtyre listave, ato janë kandidatë nga e kaluara. I vetmi kandidat për të ardhmen është Agron Demiri”, tha Kovaçevski.

“Së bashku me Sllavjankën dhe Adrijanan nga Njësia Zgjedhore numër 6, LSDM dhe koalicioni për të ardhmen do të ndjehen krenar se çfarë deputetë do të jenë”, tha Kovaçevski./Telegrafi/

Partitë opozitare të kolaicionit VLEN në një kumtesë për media thonë se kandidati për president Bujar Osmani, njëherit edhe ministër i jashtë, “do të largohet me turp pasi udhëheqja diplomacisë së vendit nga ana e tij, do të mbahet mend për dështime”.

Nga VLEN thonë se Osmani vizitën e parë si ministër i Jashtëm e realizoi në Beograd, e jo në Tiranë.

“Për vite me radhë gënjeu qytetarët në emër të integrimeve evropiane kur në fakt e dinte mirë se nuk do të arrijë t’i sigurojë numrat e nevojshëm për ndryshimet kushtetuese. Dështoi t’i hapë negociatat për anëtarësim në BE si ministër i jashtëm, ndërsa vazhdon pa pikë turpi të kërkojë vota për president për ta bllokuar sërish rrugën e Maqedonisë së Veriut drejt BE-së”.

“Vizitën e parë si ministër për punë të jashtme e realizoi në Beograd, jo në Tiranë apo Prishtinë e as në Uashington apo Bruksel. Kjo është simbolikë që tregon për rëndësinë që ai u dha raporteve me shtetet tona me të cilat na bashkon kombi ynë i përbashkët, na bashkon shqiptaria”.

“Nuk pati asnjë vizitë bilaterale në Prishtinë, po atje ishtevetëm si kryesues i OSBE-së apo në kuadër të ndonjë vizite partiake. Si ministër i jashtëm, mbi të gjitha si shqiptar, në një situatë normale do duhej të ishte zë shtesë në arenën ndërkombëtare për avokimin e çështjeve të shteteve shqiptare. Përjashtues ndaj delegacioneve shqiptare në organizimet në arenën ndërkombëtare. Sillej në mënyrë zyrtare sikur mos të ishte shqiptar e sikur mos të njihte delegacionet që përfaqësonin Kosovën. Inatet partiake nuk harronte t’i shfaqte edhe duke shfrytëzuar petkun e pozicionit në arenën ndërkombëtare, ku u bë ministri i vetëm i NATO-s që shtrëngoi duart me Lavrovin”.

“Nuk e dënoi sulmin terrorist serb në Banjskë të Kosovës edhe përkundër dëshmive për përfshirje direkte të shtetit serb. Atë e dënuan i gjithë spektri ndërkombëtar. E Bujar Osmani as nën petkun e ministrit e as të një shqiptari nuk e bëri këtë gjë. Plani i tij 9 pikësh për zgjidhjen e krizës në Veriun e Mitrovicës në Kosovë, ishte krejtësisht në favor të Serbisë e të kriminelëve të saj dhe në kundërshtim të plotë me situatën në terren”.

“Nuk u tërhoq nga Ballkani i Hapur, si projekt i Vuçiçit, i përkrahur nga Lavrovi dhe që përjashton Kosovën. Argumentet i dinin, por verbërisht vepruan vetëm që të jenë kundër Kosovës. E tash në fushatë me shumë hipokrizi deklarojnë se do të dalin nga Ballkan i Hapur, që është frazë fushate gjithsesi. Nuk dilet nga Open Ballkan me iniciatorët për hyrjen në të”.

“Iu refuzuan tre propozime për ambasadorë nga miqtë strategjik të vendit : Fërçkovski nga SHBA, Arifi nga SHBA dhe BE, si dhe Dimovski nga Franca, që të gjithë non grata për shkak të lidhjeve serbe dhe ruse. E politizoi skajshmërisht diplomacinë e vendit dhe e mbushi përplot me politikanë të dështuar dhe zyrtarë të pushtetit dhe pa përvojë diplomatike, që sollën skandale dhe dështime të njëpasnjëshme”.

“La shumë pozita ambasadorësh vakante në vendet kryesore partnere në momentet më kritike për vendin.Kur Maqedonia e Veriut u bë anëtare e plotë e NATO-s, shteti as nuk kishte ambasadorë në misionin e NATO asnë Uashington dhe u desh që protokollin e anëtarësimit t’a dorëzojë një ushtrues detyre

Programin për përkrahje të shoqatave nga diaspora e bëri program etno nacionalist maqedon nga i cili nuk përfitoi asnjë shoqatë shqiptare nga diaspora por përfituan thuajse vetëm shoqatat maqedone në Shqipëri, Serbi e Kosovë. Nisi projektin M-Karta për persona eminentë nga diaspora nga i cili përfituan kryesisht mërgimtarët maqedonas ndërkohë që 70% e diasporës tonë janë shqiptarë. Nuk e hapi kufirin në Llojan as nuk e bëri kontrollin e përbashkët kufitar në Bllacë, sado që u premtuan shumë herë dhe u paralajmëruan me pompozitet”, thonë nga VLEN./ina/

Fronti Europian mbrëmë mbajti tubim qendror në sheshin “Maqedonia” në Shkup. Sheshi ishte i mbushur përplot mbështetës të këtij fronti, i përbërë nga nëntë parti politike. Fjalime mbajtën të gjithë krerët e partive politike pjesë e Frontit Europian. Nuk munguan akuzat dhe mesazhet me retorikë më të ashpër ndaj kreut të VMRO-DPMNE-së, Hristijan Mickoski. U tha se Mickoski ka plane pro ruse bashkë me Levicën, ndërsa siç tha kreu i ASH-së Ziadin Sela, kukulla të tij janë edhe krerët e VLEN-it.

“Ne njerëzit na janë rralluar, na janë pakësuar. Si t’i kthejmë njerëzit nga Europa të kthehen këtu? Vetëm duke e futur vendin tonë në Bashkimin Europian. S’ka zgjidhje tjetër, të mos shofin ëndrra patriotike këtu, se do të bëkan fabrika Hristijani e Gordana”, tha Ali Ahmeti – Fronti Europian.

“Dhe planet e tij, donka që t’i bëjë edhe me ca kukulla që i ka gjetur te shqiptarët, që të ngjajnë me ato kukullat ruse, si i thonë, marioshka, babushka. Pesë janë, Bilalli ka hy te Izeti, e Izeti te kukulla tjetër te Bekimi, e Bekimi te Arbeni, e Arbeni te Afrimi. Bashkë të paketuar në valixhen e Mickoskit”, theksoi Ziadin Sela – Fronti Europian.

Edhe koalicioni VLEN në tubimin e mbrëmshëm e mbushi sheshin e Gostivarit. Duke komentuar tubimin e Frontit Europian, Izet Mexhiti nga koalicioni VLEN thotë se krimineli gjithmonë kthehet në vendin e krimit, duke aluduar në projektin “Shkupi 2014” me të cilin u ndërtua sheshi “Maqedonia”. Bilall Kasami me shprehjen popullore se burgu është për burra, paralajmëron se do të dënohen me burg të gjithë ata që kanë kryer vepra kriminale.

“Krimineli kthehet te vendi i krimit. Autorët e “Shkupit 2014” u kthyen atje tek luanat e Nikolla Gruevskit, ndërsa ne, pa protokoll, pa sigurime, në mesin e popullit, me popullin, erdhëm këtu në Gostivarin e flamurit kombëtar dhe nesër do të shkojmë në sheshin “Skenderbe””, pohoi Izet Mexhiti – VLEN.

U dërgoj të fala nga këtu se nuk do t’ju trembemi, se nuk iu kemi trembur regjimit të Millosheviqit dhe nuk iu trembemi as spiunëve e piunëve të Vuçiqit. Populli thotë, burgu është për burra, por edhe për kriminelë. Krimi nuk bën pa u ndëshkuar dhe dënuar sepse në të kundërtën përsëritet”, dekalroi Bilall Kasami – VLEN.

Koalicioni VLEN sonte në sheshin “Skenderbeu” me fillim në ora 20:30, do të mbajë tubimin kryesor me çka përmbyllet dhe fushata presidenciale. Zgjedhjet presidenciale do të mbahen të mërkurën më 24 prill. Nga sonte në mesnatë fillon heshtja zgjedhore për zgjedhjet presidenciale, ndërsa vazhdon fushata për zgjedhjet parlamentare.ina-online

Në gjashtë komunat e rajonit të Tetovës në zgjedhjet presidenciale mundësi për votim do të kenë gjithsej 188.329 qytetarë me të drejtë vote. Të drejtën e tyre të votës do të mund ta realizojnë në gjithsej 265 vendvotime.

Në Komunën e Tetovës do të votojnë 86.309 qytetarë, prej tyre 69 janë persona të sëmurë dhe të pafuqishëm, si dhe 96 njerëz të cilët ishin regjistruar si persona të zhvendosur ose janë duke e vuajtur masën e paraburgimit ose dënimit me burg. Votimi në territorin e Tetovës do të bëhet në 117 vendvotime.

Vijon Bogovina me 28.570 votues dhe 38 vendvotime. Prej tyre të martën votojnë dy persona jashtë vendit si dhe 11 për shkak të vuajtjes së dënimit me burg ose masës së paraburgimit, si dhe 25 si të sëmurë dhe të pafuqishëm.

Në Zhelinë komisioni komunal zgjedhor ka evidentuar 25.132 votues, ka 35 vendvotime. Nuk ka votues të regjistruar një ditë para zgjedhjeve.

Komuna e Tearcës numëron 22421 votues në 30 vendvotime. Prej tyre do të votojnë 8 si të sëmurë dhe të pafuqishëm, ndërsa 50 janë të zhvendosur.

Në Bërvenicë ka 24 vendvotime ku do të mund të votojnë 15.897 qytetarë. Prej tyre 15 votojnë një ditë më parë për shkak të sëmundjes ose se janë të pafuqishëm, përderisa 9 persona këtë do ta bëjnë në institucionet ndëshkuese – korrigjuese.

Më së paku votues ka në komunën e Jegunovcit ku janë regjistruar saktë 10.000 votues dhe 21 vendvotime. Nga votuesit 51 janë regjistruar që të votojnë një ditë më parë.